Rəhmli və Mərhəmətli Allahın adı ilə
Həmd olsun aləmlərin Rəbbi olan Allaha, Allahın salamı və salavatı olsun peyğəmbərimiz Muhəmməd və onun ailəsinə və səhabələrinə.
Bundan sonra:
Peyğəmbər (Allahın ona salavat və salamı olsun) buyurmuşdur: «Ramazan ayı daxil olduqda cənnətin qapıları açılar, cəhənnəmin qapıları bağlanar, şeytanlar isə zəncirlənərlər.» (Buxari, Muslim)
1 — Oruc, fəcr girdikdən gün batana qədər orucu pozan şeyləri tərk etməyə deyilir.
2 — Bu ibadət İslamın beş rüknündən biridir. Allah Rəsulu (Allahın ona salavat və salamı olsun) buyurub: «İslam beş şey üzərində qurulub: Allahdan başqa haqq məbudun olmamasına və Muhəmmədin Onun Elçisi olmasına şəhadət, namaz qılmaq, zəkat vermək, oruc tutmaq, həcc etmək.» (Buxari və Muslim)
3 — Oruc tutan insan daim ixlasa önəm verməlidir. İbadətini xalis olaraq yalnız Allah üçün etməlidir.
4 — Oruc tutmaq hər bir ağlı başında olan, həddi buluğa çatan, gücü çatan, müsafir olmayan müsəlmana vacibdir.
5 — Orucu pozan şeylər: həyat yoldaşı ilə cinsi əlaqədə olmaq, yemək, içmək, şəhvətlə məni çıxartmaq, yemək içməyi əvəz edən şeylər (qüvvətləndirici iynələr və s), bilərəkdən qusmaq, hicamə etdirmək, heyz və nifas qanının çıxması.
6 — Unudaraq yemək və ya içmək orucu pozmur.
7 — Əgər günəşin batdığını zənn edərək yeyib içərsə orucu səhihdir, lakin xəbəri olan kimi yeməyi və içməyi dayandırmalıdır.
8 — Yuxuda olarkən ihtilam olmaq orucu pozmur.
9 — Oruclu insan misvakdan istifadə edə bilər.
10 — Oruclu insan diş çıxarda bilər.
11 — Sahur yeməyini sübh azanına yaxın vaxta kimi gecikdirmək sünnətdir.
12 — İftarı isə gün batan kimi yemək sünnətdir.
13 — Oruc tutan kəs sərinləmək üçün çimə bilər.
14 — Oruc tutmaq istəyən şəxs cunub olduğu halda oruca niyyət edir, qüsulu isə fəcrdən sonra ala bilər.
15 — Heyzli və nifaslı qadın sübh girməmişdən əvvəl təmizlənərsə həmin günün orucuna niyyət edir, qüsulu isə sübh girdikdən sonra da ala bilər. Bu oruc ona vacibdir.
16 — Oruclu insanın dodaqları quruduğu halda onları su ilə nəmləndirməsində bir maneə yoxdur.
17 — Həddi buluğa çatmamış uşaqlara oruc vacib deyil, lakin öyrəşmələri üçün indidən əmr olunurlar.
Şeyx İbnu Useyminin fətvalarından seçilmişdir
Topladı: Beynəlxalq Mədinə İslam Universitetinin tələbəsi, Seymur Camalov
Sonda Həmd olsun aləmlərin Rəbbi Allaha
Leave a Comment